यवतमाळ नगरपरिषदेच्या निर्णयाचे वंशज घराण्यांसह राज्यभरातून कौतुक

येसुबाईं जयंती (२७ जुलै) पूर्व चौक नामकरण करत अनोखे अभिवादन

पोलीसनामा यवतमाळ : स्वराज्याच्या दुसऱ्या कुलमुखत्यार आणि छत्रपती संभाजी महाराजांच्या अर्धांगिनी महाराणी येसूबाई साहेबांचा स्वराज्य रक्षणासाठी लाभलेला सर्वोच्च त्याग, लढवलेला पराक्रम, दाखवलेले शौर्य आणि तेजस्वी इतिहास भावी पिढीला सदैव प्रेरणा देत रहावा, या उदात्त हेतूने यवतमाळ शहरातील दारव्हा रोडवरील चौकाचे “कुलमुखत्यार महाराणी येसुबाई चौक” असे नामकरण करण्यास यवतमाळ नगरपरिषदेने ठराव करुन अधिकृत मंजुरी दिली असून महाराष्ट्रात पहिल्यांदाच एका नगरपरिषदेने असा ऐतिहासिक निर्णय घेतल्याने यवतमाळ जिल्ह्यातील शिव-शंभुभक्तांसह श्रीमंत राजेशिर्के वंशज घराण्यांकडून तसेच अवघ्या राज्यभरातून आनंद साजरा केला जात असून नगरपरिषदेचे सर्वत्र कौतुक होताना दिसत आहे.

यवतमाळ शहरातील चौक नामकरण होण्याकामी सामाजिक कार्यकर्त्या व कुलमुखत्यार महाराणी येसूबाई सामाजिक संस्थेच्या संस्थापक अध्यक्षा सौ. भावनाताई पवन लेडे पाटील तसेच संस्थेच्या महिला सदस्यांनी सातत्यपूर्ण यशस्वी पाठपुरावा केला होता. दरम्यानच्या काळात भावनाताई लेडे पाटील यांनी सबंधित चौक नामकरण करण्याबाबतची व ठराव निर्णय झाल्याची सविस्तर माहिती महाराणी येसुबाईंचे वडील स्वराज्य निष्ठावंत श्रीमंत राजे पिलाजीराव राजे शिर्के यांचे वंशज तथा राष्ट्रवादीचे प्रदेश नेते व राष्ट्रवादी सैनिक सेलचे प्रदेशाध्यक्ष शंभुसेना प्रमुख मा.दिपकराजे शिर्के तसेच इतिहास अभ्यासक व पत्रकार वंशज लक्ष्मीकांत राजे शिर्के यांना देखील दिली होती.

त्यानुसार लक्ष्मीकांत राजेशिर्के यांनी तात्काळ संपर्क साधत नगराध्यक्षा ॲड. कु. प्रियदर्शनी उईके, मुख्याधिकारी शुभम कॅथमवार, भावनाताई लेडे पाटील, ठराव मांडणारे नगरसेवक प्रमोद बगाडे, ठरावाला अनुमोदन देणाऱ्या नगरसेविका सौ. संगीता उमेश बोबडे, नामकरण करण्यास मोलाची साथ देणारे बीजेपी गटनेते नगरसेवक नितीनभाऊ गिरी, शैलाताई मिर्झापुरे, कीर्तीताई राऊत, नीताताई केळापुरे आदींसह उपनगराध्यक्ष, अन्य सर्व नगरसेवकांनी स्तुत्य असा निर्णय करून नामकरणाचे कार्य केल्याबद्दल सर्वांचे अभिनंदन व आभार व्यक्त करत कौतुक केले आहे.

नामकरण करण्याबाबत भावना लेडे पाटील यांनी २५ जानेवारी २०२४ रोजी नगरपरिषद यवतमाळ प्रशासनाकडे सविस्तर निवेदन सादर केले होते. यावर नगराध्यक्षा सौ. प्रियदर्शनी बिना अशोक उईके यांच्या अध्यक्षतेखाली दिनांक २३ एप्रिल २०२६ रोजी नगर परिषदेची सर्वसाधारण सभा पार पडली. या सभेमध्ये नगरसेवक श्री. प्रमोद भास्कर बगाडे यांनी दारव्हा रोडवरील संबंधित चौकास “कुलमुखत्यार महाराणी येसूबाई चौक” असे नाव देण्याचा महत्त्वपूर्ण ठराव सभागृहात मांडला होता. या ठरावाला सौ. संगीता उमेश बोबडे यांनी जाहीर अनुमोदन दिले होते. महाराणी येसुबाईंच्या २७ जुलै रोजी येणाऱ्या जयंती म्हणजेच जन्मदिना पूर्वीच चौक नामकरण केल्याने उद्याच्या येणाऱ्या जयंती निमित्त २७ जुलै रोजी महाराष्ट्रभर शिव-शंभुभक्तांमध्ये मोठ्या उत्साहाने अभिवादन होताना दिसणार आहे.

यवतमाळ नगरपरिषदेचा आदर्श घेऊन महाराष्ट्रासह देशभरात स्वराज्य निष्ठावंत श्रीमंत राजे पिलाजीराव शिर्के यांच्या राजकन्या, शिवस्नुषा, शंभुपत्नी, स्वराज्याच्या दुसऱ्या महाराणी येसुबाईंच्या (राजमाता राजाऊ ) स्वराज्य विचारांचा जागर, स्वराज्यासाठी केलेले तेजस्वी कार्य, शौर्य, त्याग याची जाणीव होण्याकामी आपल्या भागातील विविध ठिकाणांना, शाळांना, प्रशिक्षण केंद्रांना, बागांना, गावांना, शहरांना, रस्त्यांना, चौकांना, सभागृहांना अशा विविध ठिकाणी नाव देऊन नामकरण मोहिम राबवली पाहिजे, तसेच महाराणी येसुबाईंचे (शाहूमाता राजाऊंचे ) नगरपरिषदेने सदर चौकात भव्य स्मारक निर्माण करावे. तसेच जयंती २७ जुलै रोजी तर स्मृतिदिन २१ डिसेंबर रोजी राज्यभर आयोजित व्हावेत अशी अपेक्षा लक्ष्मीकांत राजे शिर्के यांनी व्यक्त केली आहे.

The post महाराणी येसूबाई चौक नामकरण यवतमाळ नगरपरिषदेचा ऐतिहासिक ठराव, appeared first on POLICE NAMA.

घाटंजी : पोलीसनामा (अयनुद्दीन सोलंकी) 

दिल्लीतील शांततापूर्ण विद्यार्थी आंदोलनावर झालेल्या पोलीस कारवाईचा निषेध नोंदवत वंचित बहुजन आघाडीच्या वतीने घाटंजी बंदची हाक देण्यात आली. बंदला घाटन्जी शहरात संमिश्र प्रतिसाद मिळाला. काही व्यापाऱ्यांनी स्वयंस्फूर्तीने काही काळ दुकाने बंद ठेवून आंदोलनाला पाठिंबा दिला. तर विद्यार्थी, महिला, युवक, विविध संघटनांचे प्रतिनिधी आणि नागरिक मोठ्या संख्येने मोर्चात सहभागी झाले होते.

वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांच्या आव्हाहनानुसार, छत्रपती शिवाजी महाराज चौकातून मोर्चास प्रारंभ झाला. घाटन्जी शहरातील प्रमुख मार्गांवरून मार्गक्रमण करत मोर्चा तहसील कार्यालयावर धडकला. तेथे विद्यार्थ्यांवरील पोलीस कारवाईचा तीव्र निषेध व्यक्त करण्यात आला. तसेच विद्यार्थ्यांच्या विविध न्याय्य मागण्यांसंदर्भातील निवेदन तहसीलदार यांना देण्यात आले.

मोर्चाचे नेतृत्व वन्चित बहुजन महासन्घाचे तालुकाध्यक्ष संघपाल कांबळे (घाटन्जी) यांनी केले. यावेळी घाटन्जी शहराध्यक्ष सतीश रामटेके, अशोक करमणकर, शामराव मुनेश्वर, रा. वी. नगराळे, भीमसागर मुरार, प्रेमानंद उमरे, सचिन राठोड, अनिल रामटेके, अजय खोब्रागडे, अनंत भोयर, अनिल जावदे, प्रमोद बनसोड, सुभाष मुनेश्वर, भाविक भगत, संतोष जीवने, सुनील नगराळे, विजय रामटेके, नरेश हुमे, सुनील वेले, उमेश पिलावण, सुरेश बिटोले, पदमाबाई खोब्रागडे, सोनाली बागेश्वर, निशा बागेश्वर, मनस्वी कांबळे, कौसल्याबाई रामटेके, पौर्णिमा वासनिक, माया बागेश्वर, सुषमा घारेकर, महिमा खोब्रागडे, शालिनी रामटेके, ज्योती रामटेके, पूजा सोनटक्के यांच्यासह वंचित बहुजन आघाडीचे पदाधिकारी, कार्यकर्ते तसेच विविध संघटनांचे प्रतिनिधी मोठ्या संख्येने उपस्थित होते.

The post दिल्ली येथील जंतर मंतर विद्यार्थ्यांवरील कारवाईच्या निषेधार्थ घाटंजी बंद appeared first on POLICE NAMA.

पोलीसनामक डोंबिवली (गुरुदत्त वाकदेकर) : राष्ट्रीय ध्वज स्वीकार दिनानिमित्त २२ जुलै रोजी इनरव्हील क्लब ऑफ डोंबिवली पूर्व आणि अक्षरमंच प्रकाशन यांच्या सहकार्याने ‘आपला राष्ट्रध्वज’ या पुस्तकाचे प्रकाशन डोंबिवली येथील संकल्प तीर्थ १५० फूट राष्ट्रध्वजाच्या प्रांगणात संपन्न झाले. कल्याण ग्रामीण विधानसभेचे आमदार राजेश मोरे यांच्या हस्ते पुस्तकाचे प्रकाशन करण्यात आले.

अध्यक्षीय भाषणात आमदार राजेश मोर यांनी ‘आपला राष्ट्रध्वज’ हे पुस्तक जास्तीत जास्त मुलांपर्यंत पोहोचले पाहिजे, असे मत व्यक्त केले. या पुस्तकाच्या माध्यमातून मुलांना राष्ट्रध्वजाविषयी योग्य माहिती मिळेल आणि सजग, आदर्श नागरिक घडण्यास मदत होईल, असे ते म्हणाले. इनरव्हील क्लब ऑफ डोंबिवली पूर्वच्या सर्व महिला सदस्या हिरीरीने समाजोपयोगी आणि लोकहिताची कार्ये करत असून त्यांचे कार्य केवळ कौतुकास्पदच नव्हे, तर अनुकरणीय असल्याचेही त्यांनी नमूद केले.

यावेळी आमदार राजेश मोरे यांनी ‘आपला राष्ट्रध्वज’ हा उपक्रम आगळावेगळा असल्याचे सांगितले. इनरव्हील क्लबच्या अध्यक्षा जयश्री पंडीत, सचिव लीना चौधरी, प्रकल्प प्रमुख संगीता खर्डीकर, प्रकल्प समन्वयक रोहिणी लोकरे तसेच या उपक्रमाचे संकल्पनाकार डॉ. योगेश जोशी यांनी घेतलेली मेहनत निश्चितच कौतुकास्पद असल्याचे त्यांनी सांगितले.

कार्यक्रमाच्या प्रारंभी इनरव्हील क्लबच्या अध्यक्षा जयश्री पंडीत यांनी प्रास्ताविकातून उपक्रमाची माहिती दिली. त्यानंतर अक्षरमंच प्रकाशनचे अध्यक्ष डॉ. योगेश जोशी यांनी ‘आपला राष्ट्रध्वज’ या पुस्तकामागील संकल्पना आणि उपक्रमाची भूमिका उपस्थितांसमोर स्पष्ट केली. कार्यक्रमाला उपस्थितांनी उत्स्फूर्त प्रतिसाद दिला.

कार्यक्रमाचे सूत्रसंचालन प्रकल्प समन्वयक रोहिणी लोकरे आणि भक्ती भंडारी यांनी केले, तर आभार प्रदर्शन भक्ती भंडारी यांनी केले. राष्ट्रगीताने कार्यक्रमाची सांगता झाली.

The post ‘आपला राष्ट्रध्वज’ पुस्तकाचे प्रकाशन संपन्न appeared first on POLICE NAMA.

पालघर :- पोलीसनामा गुरुदत्त वाकदेकर :

ग्रामीण भागातील विद्यार्थ्यांच्या शिक्षणाला प्रोत्साहन देत त्यांच्या शैक्षणिक प्रवासाला बळकटी देण्याच्या उद्देशाने शिखर यूथ फाउंडेशनच्या वतीने रविवार, १२ जुलै २०२६ रोजी पालघर जिल्ह्यातील २५ जिल्हा परिषद शाळांमधील १,३५० गरजू व वंचित विद्यार्थ्यांना शैक्षणिक किट आणि रेनकोटचे वितरण करण्यात आले. या उपक्रमामुळे विद्यार्थ्यांमध्ये नवचैतन्य निर्माण झाले.

या उपक्रमाची सुरुवात जिल्हा परिषद शाळा, सोमटे येथे झाली. त्यानंतर नानिवली आश्रम शाळेत दुसऱ्या टप्प्यात, तसेच नागझरी जिल्हा परिषद शाळेत वितरण कार्यक्रम पार पडला. या अभियानांतर्गत विद्यार्थ्यांना एकूण १,३५० शैक्षणिक किट आणि १,३५० रेनकोट वितरित करण्यात आले. नव्या शैक्षणिक वर्षासाठी आवश्यक वह्या, स्टेशनरी साहित्य आणि पावसाळ्यात सुरक्षितपणे शाळेत ये-जा करण्यासाठी रेनकोट मिळाल्याने विद्यार्थ्यांच्या चेहऱ्यावर आनंद झळकला.

शैक्षणिक साहित्याचे वितरण करताना विद्यार्थ्यांना नियमित शिक्षणाचे महत्त्व पटवून देण्यात आले. आत्मविश्वासाने पुढे जाण्याची प्रेरणा देत मोठी स्वप्ने पाहण्याचा संदेशही यावेळी देण्यात आला. विद्यार्थ्यांच्या चेहऱ्यावरील आनंद आणि पालकांनी व्यक्त केलेले समाधान हे या उपक्रमाचे खरे यश ठरले.

हा उपक्रम समाजातील दानशूर व्यक्ती, स्वयंसेवक, हितचिंतक आणि रोटरी क्लब ऑफ बॉम्बे पोवई यांच्या मोलाच्या सहकार्यामुळे यशस्वीरीत्या पार पडला. त्यांच्या योगदानामुळे आर्थिकदृष्ट्या दुर्बल कुटुंबांतील विद्यार्थ्यांना आवश्यक शैक्षणिक साहित्य उपलब्ध झाले. त्यामुळे त्यांच्या शिक्षणाच्या प्रवासाला महत्त्वपूर्ण आधार मिळाला.

शिक्षण, आरोग्य, पर्यावरण संवर्धन आणि समाजकल्याण या क्षेत्रांत सातत्याने कार्यरत असलेल्या शिखर यूथ फाउंडेशनने या उपक्रमातून समाजाप्रती असलेली आपली बांधिलकी पुन्हा एकदा अधोरेखित केली. भविष्यातही वंचित आणि गरजू घटकांसाठी अशाच लोकहिताच्या उपक्रमांचे आयोजन करण्याचा निर्धार संस्थेने व्यक्त केला. ग्रामीण विद्यार्थ्यांच्या शैक्षणिक उन्नतीसाठी संस्थेचे हे कार्य समाजासाठी प्रेरणादायी ठरत असल्याची भावना उपस्थितांनी व्यक्त केली.

The post शिखर यूथ फाउंडेशनच्या पुढाकारातून १,३५० विद्यार्थ्यांना शैक्षणिक किट व रेनकोटचे वाटप appeared first on POLICE NAMA.

बडनेरा, १३ जुलै (आदेश पाठक पोलीसनामा) –

सध्याच्या काळात वाढदिवस म्हणजे मोठा गाजावाजा आणि फ्लेक्सबाजी असे चित्र पाहायला मिळत असताना, बडनेरा जवळील पिंपरी यादगीर गावामध्ये मात्र एका आगळ्यावेगळ्या सामाजिक उपक्रमाने वाढदिवस साजरा करण्यात आला. प्रतिष्ठा बहुउद्देशीय संस्थेचे अध्यक्ष योगेशभाऊ घुगरे यांच्या वाढदिवसानिमित्त सोमवारी (१३ जुलै) गावात विविध सामाजिक व शैक्षणिक कार्यक्रमांचे आयोजन करण्यात आले होते. गेल्या १० वर्षांपासून घुगरे यांनी ही सामाजिक बांधिलकीची परंपरा अविरतपणे सुरू ठेवली आहे.

या वाढदिवसाचे औचित्य साधत योगेश घुगरे यांनी स्वतः पुढाकार घेऊन पिंपरी यादगीर येथील जिल्हा परिषद शाळा परिसर तसेच गावातील घरोघरी जाऊन वृक्षारोपण केले. यावेळी त्यांनी जिल्हा परिषद शाळेतील लहान मुलांना पर्यावरणाचा समतोल राखण्यासाठी वृक्षारोपणाचे काय महत्त्व आहे, हे अगदी सोप्या शब्दांत पटवून दिले. तसेच शाळकरी मुलांना विविध शैक्षणिक साहित्याचे वाटप करण्यात आले. या उपक्रमात शाळेतील विद्यार्थी, मुख्याध्यापक आणि शिक्षक वर्गाने अतिशय उत्साहाने सहभाग नोंदवला.

आश्रमशाळेत अन्नदान आणि समस्यांवर चर्चा: वृक्षारोपणासोबतच योगेश घुगरे यांनी परिसरातील आश्रमशाळेला भेट देऊन तिथे अन्नदान केले. या प्रसंगी त्यांनी आश्रमशाळेतील नागरिकांशी आणि व्यवस्थापनाशी संवाद साधून त्यांच्या अडीअडचणी जाणून घेतल्या. तसेच भविष्यात संस्थात्मक पातळीवर आणखी काही मदत लागल्यास आम्ही खंबीरपणे पाठीशी राहू, असे आश्वासन त्यांनी दिले.

गावाच्या विकासासाठी कटिबद्ध: या दौऱ्यादरम्यान योगेश घुगरे यांनी पिंपरी यादगीर गावातील महिलांशी चर्चा करून त्यांना भेडसावणाऱ्या घरगुती आणि सामाजिक समस्या समजून घेतल्या. गावाच्या सर्वांगीण विकासासाठी आणि महिलांच्या प्रश्नांचे निराकरण करण्यासाठी आम्ही नेहमीच पुढे असू. आगामी काळात गावाचा चेहरामोहरा बदलण्यासाठी यापेक्षाही मोठे विकासकाम करू, असा शब्द त्यांनी गावकऱ्यांना दिला.

या मान्यवरांची लाभली उपस्थिती: या सर्व स्तुत्य उपक्रमांच्या वेळी योगेश घुगरे यांच्यासोबत गौरव चव्हाण, अर्जुन दाते, अथर्व यादगिरे, रवी उगले, रमेश रामटेके, रावसाहेब गवई, अमोल पाटील, उत्तम काळपांडे, रतन थोरात आणि बंडू पांडे यांच्यासह अनेक कार्यकर्ते व ग्रामस्थ मोठ्या संख्येने उपस्थित होते. योगेश घुगरे यांच्या या पर्यावरणपूरक आणि सामाजिक कार्याचे संपूर्ण बडनेरा शहरात आणि पिंपरी यादगीर गावात कौतुक होत आहे

The post बडनेरा शहरा जवळच्या पिंपरी यादगीर गावात प्रतिष्ठा बहुउद्देशीय संस्था तर्फे विविध कार्यक्रमाचे आयोजन. appeared first on POLICE NAMA.

पोलिसनामा; मुंबई (गुरुदत्त वाकदेकर) :“कविता ही केवळ शब्दांची मांडणी नसून ती अंतर्मनाचा संवाद, समाजाशी असलेले नाते आणि काळाशी साधलेला संवेदनशील स्पर्श असतो,” या भावनेला केंद्रस्थानी ठेवत मराठी साहित्य व कला सेवा संस्थेच्या वतीने आयोजित करण्यात आलेले ३०वे कविसंमेलन रविवार, दिनांक १२ जुलै २०२६ रोजी दादर (पूर्व) येथील हिंदू कॉलनीतील इंडियन एज्युकेशन सोसायटी, राजा शिवाजी विद्यालयाच्या सभागृहात अत्यंत उत्साहपूर्ण, साहित्यनिष्ठ आणि भावपूर्ण वातावरणात संपन्न झाले. या साहित्यसोहळ्यात कविता, अभिवाचन आणि साहित्यचिंतन यांचा सुंदर संगम अनुभवायला मिळाला. मराठी साहित्याच्या संवर्धनासाठी, कवी–रसिक संवाद अधिक व्यापक करण्यासाठी आणि सर्जनशील अभिव्यक्तीस व्यासपीठ उपलब्ध करून देण्यासाठी गेल्या दशकभरापासून कार्यरत असलेल्या मराठी साहित्य व कला सेवा संस्थेच्या या उपक्रमाने ३०व्या टप्प्यावर पोहोचताना साहित्यप्रेमींच्या मनात विशेष स्थान निर्माण केले आहे.

कविसंमेलनाच्या पहिल्या सत्रात “मुक्त विषय” अंतर्गत सहभागी कवींनी जीवनानुभव, सामाजिक वास्तव, निसर्ग, प्रेम, मानवी नाती आणि समकालीन विषयांवर आधारित स्वरचित कवितांचे प्रभावी सादरीकरण केले. विविध भावछटांनी नटलेल्या या कवितांनी रसिकांना अंतर्मुख केले. दुसऱ्या सत्रात “महाकवी कालिदास” या विषयावर आधारित काव्यसादरीकरण झाले. भारतीय काव्यपरंपरेतील अजरामर व्यक्तिमत्त्व असलेल्या महाकवी कालिदास यांच्या साहित्यवैभवातून प्रेरणा घेत कवींनी निसर्ग, सौंदर्य, प्रेम आणि मानवी भावविश्वाचे विविध पैलू आपल्या कवितांमधून मांडले. कालिदासांच्या काव्यदृष्टीचा प्रभाव या सत्रातून अनुभवायला मिळाला.

तिसऱ्या सत्रात कवी बा. भ. बोरकर यांच्या कवितांचे अभिवाचन करण्यात आले. निसर्ग, प्रेम, अध्यात्म आणि मानवी संवेदनांनी समृद्ध असलेल्या बोरकरांच्या कवितांचे भावपूर्ण अभिवाचन रसिकांच्या मनाला स्पर्शून गेले. शब्दसंगीत आणि भावविश्वाने भारलेल्या या सत्रामुळे संपूर्ण कविसंमेलनाला वेगळीच साहित्यिक उंची प्राप्त झाली. या कविसंमेलनात बालकवयित्री अजया, अर्चना देशपांडे जोशी, सरोज सुरेश गाजरे, कृपा राकेश म्हात्रे, जान्हवी शिराळकर, डॉ. अर्चना येंदारकर, डॉ. मानसी पाटील, प्रतिक्षा पांडुरंग सरमळकर, प्रिया प्रमोद दामले, हर्षिता बेंद्रे, मयूर पालकर, मीनल शेकटकर कांबळे, वनिता सचिन साळुंखे, विवेक वसंत जोशी, सीमा खान शेख, सुनंदा रामचंद्र गिरी आणि गुरुदत्त दिनकर वाकदेकर यांनी आपल्या प्रभावी काव्यसादरीकरणातून रसिकांची मने जिंकली.

कवितांच्या आस्वादासाठी अजिता अजित मुळीक, अरविंद शिराळकर आणि श्रावणी ओमकार जोशी यांनी उपस्थित राहून कवींच्या सादरीकरणाला प्रोत्साहन दिले. त्यांच्या संवेदनशील उपस्थितीमुळे कार्यक्रमाची रंगत अधिक वाढली. कार्यक्रमाचे सूत्रसंचालन डॉ. मानसी पाटील यांनी संयत, अभ्यासपूर्ण आणि प्रभावी शैलीत केले. अल्पोपहाराची व्यवस्था डॉ. मानसी पाटील यांनी समर्थपणे सांभाळली. समारोपप्रसंगी आयोजक गुरुदत्त दिनकर वाकदेकर यांनी सहभागी कवी, आस्वादक आणि रसिकांचे मनःपूर्वक आभार मानले. कविता, साहित्यपरंपरा आणि वैचारिक देवाणघेवाण यांचा उत्सव म्हणून हे कविसंमेलन संस्मरणीय ठरल्याची भावना त्यांनी व्यक्त केली.

महाकवी कालिदासांच्या अभिजात साहित्यपरंपरेपासून बा. भ. बोरकरांच्या भावसमृद्ध काव्यविश्वापर्यंतचा साहित्यिक प्रवास घडवणारे हे कविसंमेलन उपस्थितांच्या मनात दीर्घकाळ स्मरणात राहील, असा विश्वास व्यक्त करण्यात आला. मराठी साहित्य व कला सेवा आयोजित पुढील कविसंमेलन रविवार, दिनांक २ ऑगस्ट २०२६ रोजी आयोजित करण्यात येणार असल्याची घोषणा यावेळी करण्यात आली.

The post महाकवी कालिदासांच्या काव्यवैभवापासून बोरकरांच्या निसर्गकाव्यापर्यंत : ३०वे कविसंमेलन साहित्यरसिकांच्या मनात उमटवून गेले अमिट ठसा appeared first on POLICE NAMA.

पिंपरी चिंचवड : पोलीसनामा समाधान अडसूळ

आषाढी वारीनिमित्त पंढरपूरकडे पायी प्रस्थान करणाऱ्या वारकरी भाविकांच्या सेवेसाठी अखिल रामनगर मित्र मंडळ, सामाजिक कार्यकर्ते इमाम शेख आणि त्यांचे सहकारी सनी अडसूळ यांच्या संयुक्त विद्यमाने मोफत आरोग्य तपासणी व औषध वाटप शिबिराचे आयोजन करण्यात आले होते. या स्तुत्य उपक्रमाला वारकऱ्यांचा उत्स्फूर्त प्रतिसाद लाभला.

सदर आरोग्य शिबिराची सविस्तर माहिती खालीलप्रमाणे आहे:

वारकऱ्यांची आरोग्य तपासणी आणि मोफत औषधे

पायी वारी करणाऱ्या हजारो वारकऱ्यांच्या आरोग्याची काळजी घेण्याच्या उद्देशाने हे शिबिर आयोजित करण्यात आले होते. शिबिरामध्ये उपस्थित तज्ज्ञ डॉक्टर्स आणि वैद्यकीय कर्मचाऱ्यांच्या पथकाने वारकरी भाविकांची मनोभावे आरोग्य तपासणी केली. तपासणीनंतर वारकऱ्यांना आवश्यक तो वैद्यकीय सल्ला देण्यात आला, तसेच त्यांच्या प्रकृतीनुसार लागणारी औषधे आणि पेनकिलर्सचे मोफत वाटप करण्यात आले.

दिंडीप्रमुखांच्या हस्ते इमाम शेख यांचा सत्कार

समाजाप्रती असलेली आपली बांधिलकी जपत वारकऱ्यांच्या सेवेसाठी राबविलेल्या या उपक्रमाचे सर्व स्तरांतून कौतुक होत आहे. वारकरी भाविक आणि विविध दिंडीप्रमुखांनी या सेवेबद्दल कृतज्ञता व्यक्त केली. याप्रसंगी अनेक दिंडीप्रमुखांच्या हस्ते सामाजिक कार्यकर्ते इमाम शेख यांचा शाल, श्रीफळ आणि सन्मानचिन्ह देऊन विशेष सत्कार करण्यात आला.

स्वयंसेवकांचे मोलाचे योगदान

हे शिबिर यशस्वी करण्यासाठी मंडळाच्या सर्व स्वयंसेवकांनी दिवसभर चोख नियोजन केले. वारकऱ्यांना रांगेत उभे राहण्यापासून ते औषध मिळेपर्यंत सर्व आवश्यक सुविधा स्वयंसेवकांनी पुरविल्या. “वारकरी सेवा हीच ईश्वर सेवा” या भावनेतून भविष्यातही अशाच प्रकारचे विविध समाजोपयोगी व सेवाभावी उपक्रम सातत्याने राबविणार असल्याचा संकल्प आयोजकांनी यावेळी व्यक्त केला.

The post सामाजिक कार्यकर्ते इमाम शेख यांच्या उपक्रमाचे दिंडीप्रमुखांकडून कौतुक appeared first on POLICE NAMA.

घाटंजी : पोलीसनामा ,अयनुद्दीन सोलंकी

कृषी उत्पन्न बाजार समिती, घाटंजीचे संचालक अभिषेक ठाकरे व आशिष लोणकर यांना अपात्र केल्या प्रकरणी मुंबई उच्च न्यायालयाच्या नागपूर खंडपिठात याचिका दाखल केली होती. दरम्यान, जिल्हा उप निबंधक सहकारी संस्था यवतमाळ यांनी दिलेला आदेश उच्च न्यायालयाचे न्यायमूर्ती एम. एस. जवळकर (JUSTICE MS JAWALKAR) यांनी फेटाळून लावला असुन खारीज केला होता.

सदर प्रकरणात घाटंजी कृषी उत्पन्न बाजार समितीचे सभापती व याचिकाकर्ता नितीन अशोक कोठारी यांना सर्वोच्च न्यायालयातील अपील प्रकरणात पुन्हा प्रतिज्ञापत्र दाखल करण्याची परवानगी न्यायमूर्तीद्वय जे. के. माहेश्वरी (JUSTICE JK MAHESHWARI) व न्यायमूर्ती विजय बिश्नोई (JUSTICE VIJAY BISHNOI) यांनी १३ जानेवारी २०२६ रोजी दिली होती. सदर प्रकरण 14 जुलै रोजी तात्पुरते सुचीबद्ध

केले जाऊ शकते, असे सर्वोच्च न्यायालयाने म्हटले आहे.

सदर आव्हान याचिका याचिकाकर्ता व कृषी उत्पन्न बाजार समितीचे सभापती नितीन कोठारी यांनी सर्वोच्च न्यायालयात दिनांक 5 मे 2025 रोजी 24406/2025 अन्वये दाखल केला होता. सदर प्रकरणाची पुढील सुनावणी 14 जुलै 2026 रोजी सर्वोच्च न्यायालयात होत आहे.

तथापि, उच्च न्यायालयाच्या आदेशाला घाटंजी कृषी उत्पन्न बाजार समितीचे सभापती नितीन अशोक कोठारी (रा. भांबोरा) यांनी आवाहन दिले असून, सदर प्रकरणात अपील दाखल केले आहे.

अपिलकर्ता कृषी उत्पन्न बाजार समितीचे सभापती नितीन कोठारी यांनी प्रतिवादी म्हणून कृषी उत्पन्न बाजार समितीचे माजी सभापती व संचालक अभिषेक ठाकरे, राज्याचे सचिव, विभागीय सह निबंधक सहकारी संस्था अमरावती, जिल्हा उपनिबंधक सहकारी संस्था यवतमाळ, कृषी उत्पन्न बाजार समिती घाटंजी व कृषी उत्पन्न बाजार समितीचे संचालक आशिष लोणकर यांचे विरुद्ध सर्वोच्च न्यायालयात आव्हान याचीका दाखल केली आहे. सद्यातरी सदर प्रकरण सर्वोच्च न्यायालयात प्रलंबित असुन सुरू आहे.

दरम्यान, कृषी उत्पन्न बाजार समितीचे सभापती नितीन अशोक कोठारी यांनी प्रतिवादी म्हणून, कृषी उत्पन्न बाजार समितीला सुद्धा प्रतिवादी केल्याने राजकीय वर्तुळात आश्चर्य व्यक्त करण्यात येत आहे.

गैरअर्जदार कृषी उत्पन्न बाजार समितीचे माजी सभापती व संचालक अभिषेक ठाकरे व कृषी उत्पन्न बाजार समितीचे संचालक आशिष लोणकर यांचेतर्फे ॲड. सत्यजीत ए. देसाई, ॲड. अमीत के. पाठक, ॲड. सचीन सिंग, ॲड. मधुर दुग्गल, ॲड. अनघा एस. देसाई, ॲड. सम्राट कृष्णराव शिंदे आदीं सर्वोच्च न्यायालयात काम पाहत आहे.

तर, याचिकाकर्ता कृषी उत्पन्न बाजार समितीचे सभापती नितीन कोठारी यांच्यातर्फे ॲड. अरधेंदू माउली प्रसाद, ॲड. घरोटे अनुराग, ॲड. कल्याणी भिडे घरोटे, ॲड. अश्मीत राज आदीं त्यांच्या वकीलामार्फत उच्चन्यायालयाच्या आदेशाला सर्वोच्च न्यायालयात स्थगीती मागण्याचा आटोकाट प्रयत्न केला. मात्र, सर्वोच्च न्यायालयाने सदर प्रकरणात स्थगीती देण्यास नकार देऊन सदर प्रकरण नियमीत (Regular) सुरू केले आहे.

सदर प्रकरणात २३ मे २०२५ रोजी सर्वोच्च न्यायालयाचे न्यायमूर्ती जे. के. माहेश्वरी (Justice JK Maheshwari), न्यायमूर्ती अरविंद कुमार (Justice Arvind Kumar) यांच्या समक्ष सुनावणी झाली होती.

घाटंजी कृषी उत्पन्न बाजार समितीचे माजी सभापती व संचालक अभिषेक ठाकरे व कृषी उत्पन्न बाजार समितीचे संचालक आशिष लोणकर यांना जिल्हा उपनिबंधक सहकारी संस्था, यवतमाळ यांनी महाराष्ट्र कृषी उत्पन्न खरेदी विक्री (विकास व विनियमन) अधिनियम १९६३ च्या कलम १७ अन्वये २२ ऑगस्ट २०२४ रोजी जिल्हा उपनिबंधक सहकारी संस्था नानासाहेब चव्हाण यांच्या न्यायालयाने अपात्र घोषित केले होते.

दरम्यान, घाटंजी कृषी उत्पन्न बाजार समितीचे संचालक व माजी सभापती अभिषेक ठाकरे (रिट पीटीशन क्रं. ५०४८/२०२४) व आशिष लोणकर (रिट पीटीशन क्रं. ५०५२/२०२४) या दोन संचालकांनी मुंबई उच्च न्यायालयाच्या नागपूर खंडपिठात धाव घेऊन जिल्हा उपनिबंधक सहकारी संस्थेच्या आदेशाविरुद्ध आव्हान याचीका दाखल केली. तथापि, उच्च न्यायालयाच्या आदेशाला घाटंजी कृषी उत्पन्न बाजार समितीचे सभापती नितीन अशोकराव कोठारी (रा. भांबोरा) यांनी आवाहन दिले असून, सदर प्रकरणात सर्वोच्च न्यायालयात अपील दाखल केले आहे.

घाटंजी कृषी उत्पन्न बाजार समितीचे माजी सभापती व संचालक अभिषेक ठाकरे व कृषी उत्पन्न बाजार समितीचे संचालक आशिष लोणकर यांना जिल्हा उपनिबंधक सहकारी संस्था, यवतमाळ यांनी महाराष्ट्र कृषी उत्पन्न खरेदी विक्री (विकास व विनियमन) अधिनियम १९६३ च्या कलम १७ अन्वये २२ ऑगस्ट २०२४ रोजी जिल्हा उपनिबंधक सहकारी संस्था नानासाहेब चव्हाण यांच्या न्यायालयाने अपात्र घोषित केले होते. दरम्यान, मुंबई उच्च न्यायालयाच्या नागपूर खंडपीठाचे न्यायमुर्ती एम. एस. जवळकर यांनी अपात्र संचालक अभिषेक ठाकरे व संचालक आशिष लोणकर यांच्या दोन्हीही याचिका मंजूर केल्या असून याचिकाकर्त्यांना मुळ कार्यालयात कृषी उत्पन्न बाजार समितीचे संचालक म्हणून नियुक्ती करण्याचे आदेश उच्च न्यायालयाने सचिव कृषी उत्पन्न बाजार समिती घाटंजी यांना दिले होते.

विशेष म्हणजे कृषी उत्पन्न बाजार समिती घाटंजीच्या प्रकरणात 14 जुलै 2026 रोजी सुनावणी होत असुन या प्रकरणात सर्वोच्च न्यायालयात काय निर्णय लागतो. या कडे घाटंजी तालुक्यासह यवतमाळ जिल्ह्यातील राजकीय जाणकारांचे लक्ष लागले आहे.

The post कृषी उत्पन्न बाजार समिती घाटंजी प्रकरणाची पुढील सुनावणी सर्वोच्च न्यायालयात 14 जुलै 2026 रोजी  appeared first on POLICE NAMA.

पोलीसनामा मुंबई (मिलिंद मिरजकर) :

ज्येष्ठ साहित्यिक दिलीप पाटील यांच्या ‘काळ आणि माणूस (बदलत्या समाजाचे चिंतन)’ तसेच ‘पाथवे पोएम्स – जेंटल इंग्लिश व्हर्सेस फॉर क्वायट पाथवेज ऑफ लाइफ’ या इंग्रजी कवितासंग्रहाच्या प्रकाशनाचा सोहळा, अभिवाचन आणि साहित्यचर्चा रविवारी सायंकाळी दिलीप पाटील यांच्या निवासस्थानी उत्साहपूर्ण वातावरणात संपन्न झाला. साहित्य, रंगभूमी, पत्रकारिता आणि विविध क्षेत्रांतील मान्यवरांच्या उपस्थितीमुळे कार्यक्रमाला एका दर्जेदार साहित्य संमेलनाचे स्वरूप लाभले. कार्यक्रमाचे ओघवते सूत्रसंचालन सतीश सोळांकूरकर यांनी केले. प्रारंभी दिलीप पाटील यांनी उपस्थितांचे स्वागत करून आपल्या साहित्यप्रवासाचा आढावा घेत मनोगत व्यक्त केले. प्रा. अशोक बागवे, ज्येष्ठ रंगकर्मी व साहित्यिक नारायण जाधव आणि ज्येष्ठ साहित्यिक नारायण लाळे यांच्या हस्ते दोन्ही साहित्यकृतींचे प्रकाशन करण्यात आले.

प्रकाशनानंतर नारायण जाधव यांनी दिलीप पाटील यांच्या ‘साद प्रतिसाद’ आणि ‘काळ आणि माणूस’ या पुस्तकांतील निवडक लेखनाचे रसपूर्ण अभिवाचन केले. त्यांच्या सादरीकरणाला उपस्थितांनी उत्स्फूर्त दाद दिली. याच प्रसंगी ‘गमन’ चित्रपटातील उत्कृष्ट अभिनयासाठी सांस्कृतिक कलादर्पण रजनी पुरस्कार प्राप्त नारायण जाधव यांचा डॉ. अशोक पाटील यांच्या हस्ते विशेष सत्कार करण्यात आला. ‘काळ आणि माणूस’ या पुस्तकाचा परिचय राजीव जोशी यांनी करून दिला, तर ‘पाथवे पोएम्स – जेंटल इंग्लिश व्हर्सेस फॉर क्वायट पाथवेज ऑफ लाइफ’ या कवितासंग्रहाचा परिचय सतीश सोळांकूरकर यांनी उपस्थितांना करून दिला.

प्रमुख पाहुणे नारायण लाळे आणि प्रा. अशोक बागवे यांनी आपल्या मनोगतात दिलीप पाटील यांच्या साहित्यनिर्मितीचे मनापासून कौतुक केले. समाजाभिमुख, विचारप्रवर्तक आणि काळाशी संवाद साधणाऱ्या लेखनाची आज अधिक गरज असल्याचे त्यांनी नमूद केले. पुस्तकांवरील चर्चेत नारायण लाळे, चांगदेव काळे, सनिद पाटील, अनंत जोशी, प्रकाश पाटील, किरण येले, मिलिंद मिरजकर, मनीष पाटील, प्रकाश गोठणकर, विकास भावे आणि अशोक गंगावणे यांनी अभ्यासपूर्ण समीक्षा सादर केली. साहित्यकृतींच्या आशय, शैली आणि सामाजिक संदर्भांवर त्यांनी परखड मते व्यक्त केली. डॉ. अशोक पाटील यांनीही आपल्या मनोगतात साहित्य आणि समाज यांच्यातील परस्परसंबंध अधोरेखित केला.

समारोपावेळी विनया पाटील यांनी आभारप्रदर्शन केले. संपूर्ण कार्यक्रमात दिलीप पाटील यांच्या पत्नी सुजाता पाटील तसेच पुत्र सनिद पाटील आणि सुदीप पाटील यांचा उत्साही सहभाग विशेष लक्षवेधी ठरला. कार्यक्रमाच्या यशस्वी नियोजन आणि आयोजनात मुख्य आयोजक सुजाता पाटील तसेच त्यांचे पती, निवृत्त वरिष्ठ सीमाशुल्क अधिकारी सुनील पाटील यांनी मोलाचे योगदान दिले. कार्यक्रमाचे छायाचित्रण रमेश पवार (सुरभी स्टुडिओ) यांनी केले. त्यानंतर सर्व उपस्थितांसाठी आयोजित स्नेहभोजनाने कार्यक्रमाची सांगता झाली.

वैचारिक समृद्धी, अभ्यासपूर्ण चर्चा, रसपूर्ण अभिवाचन आणि साहित्यिकांच्या मुक्त संवादामुळे हा सोहळा उपस्थितांच्या स्मरणात दीर्घकाळ राहील, अशी भावना अनेक मान्यवरांनी व्यक्त केली. उपस्थितांच्या मते, हा सोहळा केवळ पुस्तक प्रकाशनाचा कार्यक्रम न ठरता साहित्य, संस्कृती आणि वैचारिक देवाणघेवाणीचा संस्मरणीय उत्सव ठरला. साहित्यविश्वासाठी हा सोहळा प्रेरणादायी आणि अविस्मरणीय पर्व ठरल्याची भावना उपस्थितांनी व्यक्त केली.

The post दिलीप पाटील यांच्या ‘काळ आणि माणूस’ तसेच ‘पाथवे पोएम्स’ या पुस्तकांच्या प्रकाशनाने रंगला साहित्याचा संस्मरणीय सोहळा appeared first on POLICE NAMA.

पोलीसनामा मुंबई  (मिलिंद मिरजकर) :

स्वातंत्र्यसेनानी सेंट जोसेफ काका बाप्तिष्टा शासकीय औद्योगिक प्रशिक्षण संस्था, अंधेरी येथे सन २०२६–२७ च्या प्रवेश प्रक्रियेला उत्साहपूर्ण प्रारंभ झाला. कॉम्प्युटर हार्डवेअर अँड नेटवर्क मेकॅनिक या व्यवसायात प्रवेश घेणारा कुमार किरण मांडवकर हा यंदाचा प्रथम प्रवेशित प्रशिक्षणार्थी ठरला. नव्या शैक्षणिक वर्षाची सुरुवात प्रेरणादायी वातावरणात झाली.

स्वप्नांना जेव्हा जिद्दीची साथ लाभते, तेव्हा यशाच्या वाटा स्वतःच खुल्या होतात,” या प्रेरणादायी विचाराला साजेशा वातावरणात प्रथम प्रवेशित प्रशिक्षणार्थी कुमार किरण मांडवकर याचे संस्थेच्या गटनिदेशका मितू मिरजकर यांच्या हस्ते पुष्पगुच्छ व भेटवस्तू देऊन स्वागत करण्यात आले. त्यानंतर त्याचे संस्थेतील अधिकारी, निदेशक व सर्व कर्मचारी यांच्या वतीने मनःपूर्वक अभिनंदन करण्यात आले.

ज्ञान, कौशल्य आणि संस्कार यांच्या त्रिवेणी संगमातून विद्यार्थ्यांचे भविष्य घडविण्याचे कार्य संस्था सातत्याने करत आहे. प्रवेश प्रक्रियेच्या प्रारंभी प्रथम प्रवेशित प्रशिक्षणार्थ्याचा सन्मान करून विद्यार्थ्यांमध्ये आत्मविश्वास, जिद्द आणि कौशल्य शिक्षणाविषयी सकारात्मक भावना निर्माण करण्याचा संस्थेचा प्रयत्न यानिमित्त अधोरेखित झाला.

प्रथम प्रवेशित प्रशिक्षणार्थी म्हणून किरण मांडवकर याने टाकलेले हे पहिले पाऊल त्याच्या शैक्षणिक आणि व्यावसायिक वाटचालीसाठी महत्त्वपूर्ण मानले जात आहे. संस्थेतील सर्व अधिकारी व कर्मचारीवृंद यांनी त्याच्या उज्ज्वल भविष्यासाठी हार्दिक शुभेच्छा व्यक्त केल्या. या सन्मानामुळे त्याचा आत्मविश्वास अधिक बळकट होईल, असा विश्वासही उपस्थितांनी व्यक्त केला.

कौशल्य शिक्षणाच्या या मंगल प्रवासाला झालेली सुरुवात अनेक युवकांसाठी प्रेरणादायी ठरेल, अशी भावना यावेळी व्यक्त करण्यात आली. त्याच्या या पहिल्या पावलातून असंख्य युवकांना कौशल्य शिक्षणाची प्रेरणा मिळो, हीच सदिच्छा उपस्थितांनी व्यक्त केली. नव्या स्वप्नांना नवी दिशा देणाऱ्या या उपक्रमाचे उपस्थितांनी मनापासून स्वागत केले.

The post स्वातंत्र्यसेनानी सेंट जोसेफ काका बाप्तिष्ट शासकीय औद्योगिक प्रशिक्षण संस्थेत प्रवेश प्रक्रियेला उत्साहपूर्ण प्रारंभ appeared first on POLICE NAMA.