मुंबई (गुरुदत्त वाकदेकर) : आयसीसी पुरुष टी२० विश्वचषक २०२६ मधील गट अ मधील तिसऱ्या सामन्यात भारताने अमेरिकेवर २९ धावांनी शानदार विजय मिळवला. वानखेडे स्टेडियम, मुंबई येथे झालेल्या या सामन्यात भारताने फलंदाजी, गोलंदाजी आणि क्षेत्ररक्षण या तिन्ही आघाड्यांवर वर्चस्व सिद्ध केले. कर्णधार सूर्यकुमार यादवची आक्रमक खेळी हा विजयाचा कणा ठरला.
नाणेफेक गमावल्यानंतर प्रथम फलंदाजी करताना भारताची सुरुवात डळमळीत झाली. अभिषेक शर्मा आणि शिवम दुबे शून्यावर बाद झाले. इशान किशनने १६ चेंडूंमध्ये २० धावा करत डाव सावरला. तिलक वर्माने १६ चेंडूंमध्ये २५ धावांची झुंज दिली. मात्र मधल्या फळीत सातत्याने विकेट पडत राहिल्याने भारत ६ षटकांत ४ बाद ४६ अशा अडचणीत सापडला.
अशा कठीण क्षणी कर्णधार सूर्यकुमार यादवने संयम आणि आक्रमकतेचा सुंदर समन्वय साधला. त्याने ४९ चेंडूंमध्ये ८४ धावांची वादळी खेळी साकारली. या खेळीत १० चौकार आणि ४ षटकारांचा समावेश होता. अक्षर पटेलने ११ चेंडूंमध्ये १४ धावा करत उपयुक्त साथ दिली. शेवटच्या षटकांतील वेगवान धावसंख्येमुळे भारताने २० षटकांत ९ बाद १६१ धावांचा आव्हानात्मक डोंगर उभा केला.
१६२ धावांच्या लक्ष्याचा पाठलाग करताना अमेरिकेची सुरुवात अत्यंत खराब झाली. पहिल्या ४ षटकांतच ३ फलंदाज तंबूत परतले. कर्णधार मोनांक पटेल शून्यावर बाद झाला. मिलिंद कुमारने ३४ धावा केल्या. संजय कृष्णमूर्ती आणि शुभम रंजन यांनी प्रत्येकी ३७ धावांची झुंज दिली. मात्र भारतीय गोलंदाजांच्या अचूक माऱ्यामुळे अमेरिकेचा डाव सावरू शकला नाही.
मोहम्मद सिराजने टप्प्याटप्प्याने आक्रमक मारा करत ३ महत्त्वाचे बळी मिळवले. अर्शदीप सिंग आणि अक्षर पटेल यांनी प्रत्येकी २ बळी घेतले. वरुण चक्रवर्तीने मधल्या फळीत अचूक गोलंदाजी करत एक बळी मिळवला. परिणामी अमेरिका २० षटकांत ८ बाद १३२ धावांपर्यंतच मजल मारू शकली.
या सामन्यातील उत्कृष्ट खेळासाठी सूर्यकुमार यादवला सामनावीर पुरस्काराने गौरवण्यात आले. या विजयासह भारताने गट अ मधील आपली स्थिती अधिक भक्कम केली. वानखेडेवरील प्रेक्षकांनी या थरारक आणि रंगतदार लढतीचा मनसोक्त आनंद घेतला.
