अमरावती : पोलीसनामा ऑनलाइन (मनिष गुडधे) – मानवी जीवनातील दुःखाचे प्रमुख कारण तृष्णा, आसक्ती आणि लोभ आहे. मनुष्य जितका इच्छांच्या मागे धावतो, तितकाच तो दुःखाच्या गर्तेत अडकत जातो. या तृष्णेपासून मुक्त होऊन जीवनात शांती आणि समाधान मिळवण्यासाठी भगवान बुद्धांनी सांगितलेल्या अष्टांगिक मार्गाचा अवलंब करावा, असे आवाहन सुप्रसिद्ध धम्मगुरू भदन्त ग्यानरक्षित महाथेरो यांनी केले.
विश्वरत्न डॉ. बाबासाहेब आंबेडकर जयंती आणि तथागत गौतम बुद्ध जयंतीच्या निमित्ताने महाबोधी महिला बहुउद्देशीय संस्था व महाबोधी बुद्ध विहार, पंचशील नगर यांच्या संयुक्त विद्यमाने सोमवारी (दि. २७ एप्रिल २०२६) भव्य ‘एकदिवसीय बौद्ध धम्म परिषद’ आयोजित करण्यात आली होती. पंचशील नगर येथील महात्मा फुले सभागृहाजवळील प्रांगणात पार पडलेल्या या परिषदेला बौद्ध उपासक-उपासिकांचा जनसागर उसळला होता.
धम्मदेशनेतून मार्गदर्शन
कार्यक्रमाच्या अध्यक्षस्थानी औरंगाबाद येथील भदन्त ग्यानरक्षित महाथेरो ऑनलाइन उपस्थित होते. आपल्या धम्मदेशनेत त्यांनी काम तृष्णा, भव तृष्णा आणि विभव तृष्णा यावर प्रकाश टाकला. “उपासकांनी सम्यक दृष्टी, सम्यक विचार, सम्यक आचरण आणि सम्यक स्मृती यांचा अंगीकार केल्यास जीवनात परिवर्तन घडून येईल,” असे त्यांनी नमूद केले.
भिक्खू संघाची उपस्थिती
या परिषदेचे उद्घाटन अखिल भारतीय भिक्खू संघाचे मार्गदर्शक भदन्त बुद्धघोष महाथेरो यांनी केले. यावेळी धम्मपीठावर भदन्त निर्मलपुत्त आनंद महाथेरो, भदन्त चंद्रमणी थेरो, भदन्त सुभद्र थेरो, भदन्त आर्य सारीपुत्त थेरो, आर्याजी प्रजापती, आर्याजी धम्मदिपामहाथेरी यांच्यासह अनेक भिक्खू आणि आर्याजी उपस्थित होत्या. विशेष अतिथी म्हणून भारतीय बौद्ध महासभेचे राज्य संघटक विजयकुमार चौरपगार आणि नगरसेवक मंगेश मनोहरे यांची उपस्थिती होती.
नियोजन आणि सहकार्य
धम्म परिषदेचे प्रास्ताविक आणि संचालन ज्येष्ठ पत्रकार नयन मोंढे यांनी केले, तर आभार संस्थेच्या अध्यक्षा संजीवनी मनोहरे यांनी मानले. कार्यक्रम यशस्वी करण्यासाठी पंकज डोंगरे, जयकुमार चेंडकापुरे, सुधीर भगत, प्रमोद ढोले, ममता ढोले, अनिता ढोले यांच्यासह पंचशील नगरमधील सर्व पदाधिकारी व कार्यकर्त्यांनी विशेष परिश्रम घेतले.
या परिषदेमुळे परिसरात मंगलमय वातावरण निर्माण झाले होते. हजारो अनुयायांनी महामानवांच्या विचारांची शपथ घेऊन धम्म परिषदेचा लाभ घेतला.
