मुंबई : पोलीसनामा ऑनलाइन – राज्याच्या प्रशासकीय वर्तुळातून एक मोठी आणि महत्त्वाची बातमी समोर येत आहे. डॅशिंग आयएएस (IAS) अधिकारी तुकाराम मुंढे (Tukaram Mundhe) यांची आपत्ती व्यवस्थापन विभागात झालेली नियुक्ती रद्द झाली आहे. या विभागाच्या प्रधान सचिव विनिता सिंघल (Vinita Singhal) यांची बदली अवघ्या १० दिवसांत रद्द करण्यात आल्याने, तुकाराम मुंढे आता पुन्हा एकदा नव्या नियुक्तीच्या प्रतीक्षेत आहेत.
नेमके काय घडले?
सुमारे १० दिवसांपूर्वी राज्य शासनाने सनदी अधिकाऱ्यांच्या बदल्यांचे आदेश काढले होते. यामध्ये आपत्ती व्यवस्थापन विभागाच्या प्रधान सचिव विनिता वैद सिंघल यांची बदली करण्यात आली होती आणि त्यांच्या जागी दिव्यांग विभागाचे प्रधान सचिव तुकाराम मुंढे यांची वर्णी लागली होती. मात्र, या बदली प्रक्रियेदरम्यानच तुकाराम मुंढे यांच्या मातोश्रींचे निधन झाल्याने ते रजेवर होते, त्यामुळे त्यांना नवीन पदाचा कार्यभार स्वीकारता आला नाही.
विनिता सिंघल यांची पुनर्नियुक्ती
मुंढे रजेवर असतानाच मंत्रालयीन स्तरावर वेगाने घडामोडी घडल्या आणि सामान्य प्रशासन विभागाने नवा आदेश काढून विनिता सिंघल यांची बदली रद्द केली. त्यांना पुन्हा त्यांच्या मूळ पदावर म्हणजेच आपत्ती व्यवस्थापन विभागाच्या प्रधान सचिवपदी कायम ठेवण्यात आले आहे. सिंघल यांची अवघ्या पाच महिन्यांपूर्वीच या विभागात नियुक्ती झाली होती, मात्र आता त्यांची बदली रद्द करून त्यांना पुन्हा तिथेच नियुक्त केल्याने आश्चर्य व्यक्त होत आहे.
मुंढे आता नव्या प्रतीक्षेत
विभागाचा पदभार स्वीकारण्यापूर्वीच विनिता सिंघल यांची पुनर्नियुक्ती झाल्यामुळे तुकाराम मुंढे यांची या पदावरील वर्णी हुकली आहे. शिस्तप्रिय कार्यशैलीसाठी ओळखल्या जाणाऱ्या मुंढे यांनी दिव्यांग विभागात अनेक महत्त्वाचे निर्णय घेतले होते. आता राज्य सरकार त्यांना कोणत्या नवीन विभागाची जबाबदारी देते, याकडे सर्वांचे लक्ष लागले आहे.
अल्पकाळात बदल्यांचे आदेश बदलल्यामुळे यामागे नेमकी काय तांत्रिक किंवा प्रशासकीय कारणे आहेत, याबाबत आता प्रशासकीय वर्तुळात मोठी चर्चा रंगली आहे.
