परभणी/मानवत : पोलीसनामा ऑनलाइन (मनिष गुडधे) – क्रांतिसूर्य महात्मा जोतिबा फुले आणि विश्वरत्न डॉ. बाबासाहेब आंबेडकर यांच्या संयुक्त जयंतीचे औचित्य साधून पोलीस मित्र परिवार समन्वय समितीच्या वतीने मानवत येथे विद्यार्थ्यांना शालेय साहित्य वाटप करून महामानवांना अनोखी मानवंदना देण्यात आली. सामाजिक बांधिलकी जपत राबवण्यात आलेल्या या उपक्रमाचे सर्वत्र कौतुक होत आहे.
पोलीस मित्र परिवार समन्वय समितीचे संस्थापक अध्यक्ष डॉ. संघपाल उमरे यांच्या मार्गदर्शनाखाली आणि महाराष्ट्र राज्य उपाध्यक्षा सौ. रेखाताई मनेरे यांच्या नेतृत्वाखाली हा कार्यक्रम मानवत पोलीस स्टेशन येथे संपन्न झाला. कार्यक्रमाच्या अध्यक्षस्थानी मानवतचे पोलीस निरीक्षक संदीप बोरकर होते, तर उद्घाटक म्हणून सहाय्यक पोलीस उपनिरीक्षक पतंगे यांची उपस्थिती होती.
विद्यार्थ्यांना वही-पेनचे वाटप महामानवांच्या विचारांचा वारसा पुढे नेण्यासाठी शिक्षणाचे महत्त्व ओळखून यावेळी उपस्थित विद्यार्थ्यांना वह्या आणि पेनचे वाटप करण्यात आले. पोलीस मित्र परिवार समन्वय समिती दरवर्षी अशा प्रकारचे समाजोपयोगी उपक्रम राबवून जयंती साजरी करत असते. यावेळी प्रमुख पाहुणे म्हणून पोलीस कर्मचारी बंकर लटपटे आणि नरेंद्र कांबळे यांची प्रमुख उपस्थिती होती.
पोलीस निरीक्षकांकडून कार्याचे कौतुक कार्यक्रमाचे अध्यक्ष पोलीस निरीक्षक संदीप बोरकर यांनी समितीच्या सामाजिक कार्याचे विशेष कौतुक केले. “समाजातील गरजू घटकांसाठी राबवण्यात येणारे असे उपक्रम कौतुकास्पद आहेत. भविष्यातही अशा उपक्रमांमध्ये पोलीस प्रशासन सक्रिय सहभाग घेईल,” असे आश्वासन देत त्यांनी समितीला पुढील वाटचालीस शुभेच्छा दिल्या.
पदाधिकाऱ्यांची मोठी उपस्थिती कार्यक्रमाचे प्रास्ताविक आणि सूत्रसंचालन राज्य उपाध्यक्षा सौ. रेखाताई मनेरे यांनी केले, तर आभार प्रदर्शन महिला पोलीस जयश्री मुंढे यांनी मानले. कार्यक्रम यशस्वी करण्यासाठी नरेंद्र कांबळे आणि ज्ञानेश्वर चोपडे यांनी विशेष परिश्रम घेतले.
याप्रसंगी मराठवाडा अध्यक्ष शेख अजहर हादगवकर, मराठवाडा संघटक अहेमद अन्सारी, जिल्हा सचिव शेख इफ्तेखार बेलदार, जिल्हा अध्यक्ष जयश्री पुंडगे, अंतिका वाघमारे, मीरा नाईक, छाया अंभोरे, शेख शमीना, सुमन साळवे यांच्यासह समितीचे सर्व पदाधिकारी आणि मानवत पोलीस स्टेशनचा कर्मचारी वर्ग उपस्थित होता.
