पोलीसनामा विशेष: मेळघाटाच्या डोंगरदऱ्यात जिल्हा प्रशासनाचा थरार; जिल्हाधिकारी आशिष येरेकर यांनी ६ किमी ट्रेकिंग करत सर केला ऐतिहासिक ‘गाविलगड’!
अमरावती (प्रतिनिधी): प्रशासकीय कामाचा व्यापे आणि ताण बाजूला सारून, अमरावती जिल्हा प्रशासनाने निसर्गाच्या कुशीत एक वेगळा अनुभव घेतला. जिल्हाधिकारी आशिष येरेकर यांच्या नेतृत्वात आज मेळघाटातील ऐतिहासिक गाविलगड किल्ल्यावर विशेष ‘ट्रेकिंग’ मोहिमेचे आयोजन करण्यात आले होते. मोझरी पॉईंटपासून सुरू झालेला हा ६ किलोमीटरचा चढणीचा प्रवास अधिकाऱ्यांसाठी विरंगुळा आणि थ्रिल देणारा ठरला.
थरारक पदभ्रमंती आणि निसर्गसानिध्य:
दैनंदिन कामातून थोडा वेळ काढून निसर्गाशी नाते जोडण्यासाठी जिल्हाधिकारी कार्यालयातर्फे या मोहिमेचे आयोजन करण्यात आले होते. सकाळी ६ वाजता मोझरी गावातून या पदभ्रमंतीला सुरुवात झाली. घनदाट जंगल, हिरव्यागार दऱ्या आणि मेळघाटातील निसर्गरम्य वातावरणातून वाट काढत सर्व अधिकारी सकाळी ९ वाजता गाविलगड किल्ल्यावर पोहोचले. सुमारे ६ किलोमीटरचा खडतर आणि थरारक मार्ग जिल्हाधिकाऱ्यांनी पायी पार केला.
किल्ल्याच्या संवर्धनावर भर:
गाविलगड किल्ल्यावर पोहोचल्यानंतर जिल्हाधिकारी श्री. येरेकर यांनी किल्ल्याचा ऐतिहासिक वारसा, भौगोलिक रचना आणि संवर्धनाच्या कामाची सविस्तर पाहणी केली. किल्ल्याचे महत्त्व आणि पर्यटन विकासाच्या दृष्टीने भविष्यातील पावले कशी असावीत, यावर त्यांनी चर्चा केली. यावेळी शिवा काळे यांनी किल्ल्याच्या ऐतिहासिक महत्त्वाबाबत सविस्तर माहिती दिली.
प्रशासकीय फळीचा उत्स्फूर्त सहभाग:
या मोहिमेत अचलपूरचे उपविभागीय अधिकारी बळवंत अरकराव, उपवनसंरक्षक अग्रिम सैनी, तहसीलदार जीवन मोराणकर, सुदर्शन सहारे यांच्यासह जिल्हा प्रशासनातील विविध विभागांचे वरिष्ठ अधिकारी आणि त्यांचे कुटुंबीय मोठ्या संख्येने सहभागी झाले होते. विभागीय वन अधिकारी अनंत डिगोळे यांनी या संपूर्ण मोहिमेचे चोख नियोजन केले.
नव्या उर्जेचा ‘मेळघाट’ पॅटर्न:
“प्रशासकीय ताण हलका करण्यासाठी आणि अधिकाऱ्यांमध्ये संघभावना (Team Spirit) वाढवण्यासाठी हा उपक्रम महत्त्वाचा आहे. मेळघाटातील निसर्गाच्या कुशीत घालवलेले हे क्षण अविस्मरणीय आहेत,” अशी भावना सहभागी अधिकाऱ्यांनी व्यक्त केली. हा उपक्रम ऐतिहासिक वारसा जतन आणि पर्यटन विकासाच्या दृष्टीने एक सकारात्मक पाऊल मानले जात आहे.
